Flokkar:

  • Almennt
  • Börn
  • Íþróttir & tómstundir
  • Saga
  • Sýningar
  • Tónlist
  • Útisvið
  • Veitingar

Dagar:

  • Miðvikudagur
  • Fimmtudagur
  • Föstudagur
  • Laugardagur
  • Sunnudagur

Valdar síur:

Close

Print iconPrenta alla viðburði

Rokksafn Íslands

Rokksafn Íslands, Hljómahöll, Hjallavegi 2, 260 Reykjanesbæ
Sýningar
tomas@hljomaholl.is  
Miðvikudagur    11:00 - 18:00
Fimmtudagur    11:00 - 18:00
Föstudagur    11:00 - 18:00
Laugardagur    11:00 - 18:00
Sunnudagur    11:00 - 18:00
event photo
Rokksafn Íslands er safn um sögu popp- og rokktónlistar á Íslandi. Safnið er staðsett í Hljómahöll í Reykjanesbæ. Á safninu er að finna tímalínu um sögu íslenskrar tónlistar á Íslandi allt frá árinu 1830 til dagsins í dag. Á safninu er að finna lítinn kvikmyndasal þar sem sýndar eru ýmsar heimildarmyndir um íslenska tónlist og hljóðbúr þar sem gestir geta leikið lausum hala og prófað rafmagnstrommusett, gítar, bassa og sungið í sérhönnuðum söngklefa. Á meðal þeirra muna sem eru að finna á safninu er trommusett Gunnars Jökuls Hákonarsonar sem var m.a. notað á meistaraverkinu ...Lifun með Trúbrot, kjól sem Emilíana Torrini klæddist í myndbandinu Jungle Drum, tréskúlptúr af reggí-hljómsveitinni Hjálmum, lúðrasveitarjakka sem Stuðmenn klæddust í myndinni Með allt á hreinu, kjól af Elly Vilhjálms, föt af Rúnari Júlíussyni, jakkaföt af Herberti Guðmundssyni, hljóðnema sem Megas söng í á tveimur plötum og þannig mætti lengi telja.

Í Rokksafni Íslands er að finna Rokkbúðina en þar má finna ýmsan varning tengdan rokksögunni s.s. ævisögur um íslenska tónlistarmenn, bækur sem rekja sögu tónlistar á Íslandi, geisladiska, vínylplötur, íslenskar heimildarmyndir um tónlist, varning frá Sigur Rós, Björk, Of Monsters and Men, Páli Óskari, Björgvini Halldórssyni og mörgum fleiri, trommukjuða, gítarstrengi, gítarneglur, gítarsnúrur, heyrnartól, hátalara og svo auðvitað vinsælustu vöruna okkar - boli sem eru merktir Rokksafni Íslands - og margt margt fleira. Við mælum eindregið með heimsókn í Rokk-búðina.

Á Rokksafni Íslands hafa verið settar upp tvær sérsýningar um íslenska tónlistarmenn, þá Björgvin Halldórsson og Pál Óskar Hjálmtýsson.

ÞÓ LÍÐI ÁR OG ÖLD
um Björgvin Halldórsson

Á sýningunni Þó líði ár og öld um Björgvin Halldórsson er farið um víðan völl og fjallað er ítarlega um hinar ýmsu hliðar Björgvins. Eins og flestum er kunnugt hefur Björgvin verið einn ástsælasti og vinsælasti söngvari landsins um árabil og sungið með hljómsveitum eins og Bendix, Flowers, Ævintýri, Hljómum, Brimkló, Change, HLH flokknum, Ðe lónlí blú bojs og mörgum fleiri.

Björgvin hefur líka sinnt ýmsum störfum tengdum tónlist og fjölmiðlum í gegnum tíðina og má til dæmis nefna að hann starfaði sem markaðsfulltrúi á Íslensku auglýsingastofunni um tíma, var útvarpsstjóri Stjörnunnar og Bylgjunnar, framleiðandi og sjónvarpsstjóri Bíórásarinnar sem og verið rödd Stöðvar 2 um árabil. Einnig hefur Björgvin verið útgefandi, upptökustjóri, sinnt stjórnunarstörfum hjá hinum ýmsu fagfélögum tónlistarmanna og verið markaðsstjóri á veitingahúsinu Broadway.

Fjallað er um margar hliðar Björgvins á sýningunni og þeim gerð skil með hjálp tækninnar. Á sýningunni segir Björgvin sögur af ferli sínum og aðrir segja sögur af honum. Björgvin er mikill safnari og á sýningunni má finna fjölmarga muni sem hann hefur haldið til haga frá ferli sínum og samstarfsmanna í gegnum tíðina. Þar á meðal er hluti gítarsafns hans á sýningunni, plaköt allt frá fyrstu tónleikum til dagsins í dag, gullplötur, textablöð, ógrynni ljósmynda og myndbanda og þannig mætti lengi telja. Undirbúningur sýningarinnar stóð yfir í tæpt ár og er óhætt að sýningin sé öll hin glæsilegasta!

EINKASAFN POPPSTJÖRNU
um Pál Óskar Hjálmtýsson

Páll Óskar er mikill safnari og er sýningin „Einkasafn poppstjörnu“ sterkur vitnisburður um það. Á meðal muna á sýningunni er fjöldinn allur af sérhönnuðum búningum og fatnaði frá tónleikum hans­, handskrifaðar dagbækur hans, teikningar frá barnæsku, allar gull-­ og platínuplöturnar hans, plaköt frá tónleikum og dansleikjum, upprunaleg texta­- og nótnablöð af þekktustu lögum hans og þannig mætti lengi telja. Páll Óskar segir sjálfur frá hverju æviskeiði með hjálp tækninnar. Þá geta gestir skellt sér í söngklefa og sungið Pallalög í þar til gerðu hljóðveri. Óhætt er að segja að gestir komast ekki nær Páli Óskari en á sýningunni "Páll Óskar - Einkasafn poppstjörnu".

AÐGANGSEYRIR á Rokksafn Íslands : 1500 kr.
OPNUNARTÍMI :11-18 alla daga.
Aðgangseyrir fyrir eldri borgara/öryrkja: 1200 kr. Frítt er fyrir 16 ára & yngri í fylgd með fullorðnum.

Styrktaraðilar