Ljósanótt - Fréttir

Takk fyrir frábæra Ljósanótt

Tue, 08 Sep 2026 15:09:04 GMT

Ljósanótt 2026 er að baki eftir einstaklega vel heppnaða hátíð þar sem Reykjanesbær iðaði af lífi, menningu og góðri stemningu. Fjöldi fólks lagði leið sína á hátíðina og tók þátt í fjölbreyttri dagskrá sem teygði sig um bæinn allan.

Vilhjálmur Árnason bæjarstjóri segir mikla ástæðu til að vera stolt af hátíðinni og þakkar öllum þeim fjölmörgu sem lögðu sitt af mörkum til að gera Ljósanótt að þeirri hátíð sem hún er.

„Ljósanótt er okkar hátíð og við getum svo sannarlega verið stolt af henni. Reykjanesbær skartaði sínu fegursta og við tókum á móti miklum fjölda gesta með glæsibrag. Það er vart hægt að hugsa sér betri leið til að kveðja sumarið og ganga inn í haustið af krafti,“ segir Vilhjálmur.

Samfélagið tók virkan þátt

Eitt af því sem einkenndi Ljósanótt í ár var hversu víða líf og fjör skapaðist. Samhliða dagskrá hátíðarinnar fjölgaði viðburðum víðs vegar um bæinn, listasýningar og pop-up staðir spruttu upp, verslanir og veitingastaðir tóku virkan þátt og handverksfólk, listafólk, félagasamtök og fjölmargir aðrir lögðu sitt af mörkum.

„Það var sérstaklega ánægjulegt að sjá hversu öflugt samfélagið okkar var í að byggja ofan á þann grunn sem Reykjanesbær leggur með hátíðinni. Allt þetta gerði Ljósanótt enn stærri og líflegri og stemningin hélst langt fram á sunnudag,“ segir Vilhjálmur.

Að baki hátíð af þessari stærðargráðu liggur jafnframt mikil vinna. Fjöldi starfsmanna Reykjanesbæjar kemur að skipulagningu, undirbúningi og framkvæmd Ljósanætur auk fjölmargra samstarfsaðila, verktaka, fyrirtækja og einstaklinga.

„Það er auðvelt að sjá glæsilega hátíð, fullar götur og góða stemningu þegar allt er komið af stað. Það sem sést síður er öll vinnan sem liggur að baki - vikur og mánuðir af undirbúningi og síðan langir dagar meðan á hátíðinni stendur. Öllum þeim sem komu að hátíðinni með einum eða öðrum hætti færi ég innilegar þakkir.“

Takk fyrir Ljósanótt 2026

Reykjanesbær þakkar öllum sem komu að Ljósanótt 2026 fyrir þeirra framlag - starfsfólki, samstarfsaðilum, styrktaraðilum, listafólki, félagasamtökum, fyrirtækjum, viðburðahöldurum og öllum öðrum sem lögðu hönd á plóg.

Síðast en ekki síst eru íbúum og gestum færðar bestu þakkir fyrir þátttökuna og fyrir að skapa þá einstöku stemningu sem einkenndi bæinn alla hátíðardagana.

Takk fyrir frábæra Ljósanótt – og sjáumst að ári!

Vilhjálmur Árnason,

bæjarstjóri

Enn nóg um að vera á síðasta degi Ljósanætur

Sun, 06 Sep 2026 09:48:10 GMT

Ljósanótt 2026 lýkur í dag eftir viðburðaríka hátíðardaga í Reykjanesbæ. Mikill mannfjöldi lagði leið sína á hátíðina í gær. Árgangagangan setti svip sinn á bæinn og hátíðarsvæðið iðaði af lífi áður en stórtónleikar og flugeldasýning settu punktinn yfir i-ið á laugardagskvöldinu í blíðskaparveðri sem skapaði ógleymanlega stemningu yfir miðbænum.

Þótt stærsti dagur hátíðarinnar sé að baki er Ljósanótt ekki alveg búin. Bjart og fallegt veður tekur á móti gestum á síðasta deginum og fjölbreytt dagskrá verður víða um Reykjanesbæ.

Meðal dagskrárliða í dag er söguganga um gamla bæinn í Keflavík kl. 11 og síðar um daginn tekur tónlistin við á ýmsum stöðum. Tónleikar verða í Kirkjuvogskirkju í Höfnum og kvölddagskrá verður að venju í Keflavíkurkirkju, auk þess sem minningartónleikarnir Himinn og jörð um Gunnar Þórðarson fara fram í Hljómahöll. Það er einkar viðeigandi að á Ljósanótt gefist tækifæri til að minnast Gunnars og þess mikla tónlistararfs sem hann skilur eftir sig.

Sunnudagurinn er jafnframt góður dagur til að rölta um bæinn, heimsækja sýningar og viðburði og njóta þess síðasta sem Ljósanótt 2026 hefur upp á að bjóða áður en hátíðinni lýkur.

Alla dagskrá dagsins má finna á ljosanott.is.

Ljósanótt 2026 lýkur í dag, sunnudaginn 6. september.

Stærsti dagur Ljósanætur framundan

Sat, 05 Sep 2026 10:38:35 GMT

Ljósanótt er komin á fullt í Reykjanesbæ og framundan er stærsti dagur hátíðarinnar. Fjölbreytt dagskrá verður í bænum í dag, laugardaginn 5. september, og búist er við miklu lífi á hátíðarsvæðinu frá morgni og fram á kvöld.

Föstudagurinn fór vel fram og samkvæmt upplýsingum frá lögreglu gekk nóttin vel. Nú tekur laugardagurinn við með þéttri dagskrá fyrir alla aldurshópa.

Einn af föstu og skemmtilegustu liðum Ljósanætur er árgangagangan sem leggur af stað eftir hádegið og endar við stóra sviðið. Þar koma saman fjölmargir árgangar og sérstaklega er 50 ára árgangurinn jafnan áberandi og setur sinn svip á gönguna og móttökuna á hátíðarsvæðinu.

Dagskráin heldur áfram víða um bæinn í allan dag með tónlist, sýningum, ókeypis barnadagskrá og ýmiss konar uppákomum.

Í kvöld verður síðan stórtónleikadagskrá Ljósanætur á stóra sviðinu. Þar koma fram Leikfélag Keflavíkur með brot úr We Will Rock You, Alaska1867, Hipsumhaps, Birgitta Haukdal og Kristmundur Axel ásamt hljómsveit og Emmsjé Gauti. Hin árlega flugeldasýning Ljósanætur verður kl. 22:00. Tónleikunum verður einnig útvarpað á Rás

Gestir eru hvattir til að gefa sér góðan tíma, kynna sér lokanir og aðkomu að hátíðarsvæðinu og njóta dagsins saman.

Alla dagskrá Ljósanætur má finna á ljosanott.is.

Ljósanótt stendur yfir í Reykjanesbæ dagana 3.–6. september.

Ljósanótt er hafin!

Fri, 04 Sep 2026 11:22:51 GMT

Fjölbreytt dagskrá fram undan

Ljósanótt, menningar- og fjölskylduhátíð Reykjanesbæjar, var formlega sett í Skrúðgarðinum í Keflavík í gær og fram undan er viðburðarík helgi þar sem menning, tónlist, mannlíf og samvera verða í fyrirrúmi um allan bæ.

Fjöldi barna tók þátt í setningarathöfninni, en þar komu saman elstu börn leikskóla Reykjanesbæjar og nemendur í 3., 7. og 10. bekk grunnskólanna. Vilhjálmur Árnason bæjarstjóri setti hátíðina, fulltrúi Ungmennaráðs dró hinn litríka Ljósanæturfána að húni og Páll Óskar hélt uppi fjörinu við góðar undirtektir. Setningunni lauk svo með sameiginlegum söng Ljósanæturlagsins.

Hátíðarstemningin hélt áfram síðdegis og fram á kvöld þegar sýningar og fjölbreyttir viðburðir opnuðu víða um bæinn. Í Duus safnahúsum voru tvær nýjar sýningar opnaðar, Nína, okkar kærasta Nína í Listasafni Reykjanesbæjar og Litið í baksýnisspegilinn í Byggðasafni Reykjanesbæjar.

Föstudagurinn tekur við

Í dag færist enn meira líf yfir hátíðarsvæðið og fjölbreytt dagskrá stendur yfir frá morgni og langt fram á kvöld. Sýningar og markaðir verða opnir víða, Duus safnahús taka á móti gestum frá kl. 12–18 og síðdegis verður meðal annars boðið upp á ókeypis barnaskemmtun í Skrúðgarðinum.

Frá kl. 18 verður mikið um að vera við Tjarnargötu þegar Skólamatur býður gestum Ljósanætur í kjötsúpu að venju. Á Kjötsúpusviðinu verður jafnframt fjölbreytt dagskrá þar sem DansKompaní verður heiðrað fyrir einstakan árangur á Dance World Cup í Dublin í sumar. DansKompaní stígur á svið ásamt Ungleikhúsinu og Deisí áður en Föruneytið tekur við og heldur uppi stemningunni fram eftir kvöldi.

Föstudagskvöldið býður síðan upp á fjölmarga viðburði víðs vegar um Reykjanesbæ, meðal annars Brekkusöng í Njarðvík, Heima í Höfnum, Heimatónleika, uppistand og tónleika.

Stærsti dagurinn fram undan

Á morgun, laugardag, nær Ljósanótt svo hámarki. Þá verður fjölskyldudagskrá og fjölbreyttir viðburðir um allan bæ, hin sívinsæla Árgangaganga setur svip sinn á bæjarlífið og um kvöldið taka stórtónleikar við á aðalsviði. Þar koma meðal annars fram Leikfélag Keflavíkur með We Will Rock You, Alaska1867, Hipsumhaps, Birgitta Haukdal og Kristmundur Axel ásamt hljómsveit og Emmsjé Gauti. Klukkan 22 lýsir flugeldasýning Björgunarsveitarinnar Suðurnesja upp næturhimininn og ljósin á Berginu verða tendruð.

Leiðarstef Ljósanætur er „Saman með ljós í hjarta“ og íbúar og gestir eru hvattir til að njóta hátíðarinnar saman, sýna hvert öðru og umhverfinu tillitssemi og leggja sitt af mörkum til góðrar og öruggrar hátíðarstemningar.

Ljósanótt stendur til sunnudagsins 6. september og dagskráin heldur áfram alla helgina.

Alla dagskrá Ljósanætur og hagnýtar upplýsingar má finna á ljosanott.is .

Opnunartímar og tilboð fyrir bæjarbúa í tívolítækin 2026

Mon, 31 Aug 2026 16:57:44 GMT

Tilboð fyrir bæjarbúa í tívolítækin 2026

Á Ljósanótt 2026 hafa tvö fyrirtæki með tívolítæki staðfest komu sína, Sprell og Kastalar.

SPRELL – verður með tæki á túninu við aðalsviðið frá fimmtudegi til sunnudags.

KASTALAR – verða með tæki frá föstudegi til sunnudags á túninu við Duustorg við enda Vesturgötu og Vesturbrautar.

Opnunartímar í tívolítækin eru eftirfarandi:

Kastalar Sprell

Fös 15-20 16-22

Lau 12-22 13-23

Sun 12-16 14-17

Kaupa þarf miða hjá hvoru fyrirtæki fyrir sig og því gilda EKKI sömu miðar hjá báðum aðilum.

Athygli er vakin á því að frítt verður í hoppukastalaland fyrir yngstu börnin í Skrúðgarðinum í Keflavík á laugardegi og sunnudegi!

Íbúum Reykjanesbæjar býðst að kaupa miða í tívolítæki hjá fyrirtækjunum á tilboðsverði miðvikudaginn 2. september og fimmtudaginn 3. september!

SPRELL

2. september miðvikudagur frá kl. 17-20.

3. september fimmtudagur frá kl. 17-20

Stakur miði verður á 50% afslætti (250kr) þessa tvo daga en eftir það fara þeir í almenna sölu.

3-4 miðar í hvert tæki og endurgreiðsla ómöguleg.

KASTALAR

2. september miðvikudagur frá kl. 15-19

3. september fimmtudagur frá kl. 15-19

Stakur miði verður á 50% afslætti (250kr) þessa tvo daga en eftir það fara þeir í almenna sölu og eru verðin þá eftirfarandi:

Einn miði 500kr

6 miðar 2500kr

10 miðar 4000kr

20 miðar 7000kr

30 miðar + tveir skammtar af popp eða candyfloss = 11.000kr

2-4 miðar í hvert tæki.

Ljósberar standa þétt við bakið á Ljósanótt

Wed, 26 Aug 2026 18:54:55 GMT

Aðalstyrktaraðilar Ljósanætur 2026, svokallaðir Ljósberar , undirrituðu í dag samstarfssamninga við Reykjanesbæ við hátíðlega athöfn í Hljómahöll. Undirritunin fór fram í tengslum við þakkarhóf Ljósanætur þar sem fyrirtækjum og öðrum samstarfsaðilum hátíðarinnar var þakkaður ómetanlegur stuðningur.

Ljósanótt verður haldin dagana 3.–6. september og undirbúningur fyrir eina stærstu bæjarhátíð landsins er nú á lokametrunum. Á sjötta tug fyrirtækja styðja hátíðina með fjárframlögum, þjónustu og margvíslegu samstarfi og skiptir stuðningur atvinnulífsins miklu máli við að gera umfangsmikla og fjölbreytta dagskrá hátíðarinnar að veruleika.

Ljósberar Ljósanætur 2026

Ljósberar eru stærstu bakhjarlar Ljósanætur og eru níu talsins í ár:

Landsbankinn, Skólamatur, KEF Keflavíkurflugvöllur, BUS4U, Blue Car Rental, Nettó, GTS, JeEs arkitektar og Reykjanes Investment.

Við undirritunina þakkaði Vilhjálmur Árnason bæjarstjóri Ljósberunum og öðrum styrktaraðilum fyrir mikilvægt framlag þeirra til hátíðarinnar og samfélagsins í Reykjanesbæ.

„Ljósanótt verður ekki til hjá sveitarfélaginu einu. Hún verður til vegna þess að samfélagið allt leggst á eitt – íbúar, félög, fyrirtæki og fjölmargir samstarfsaðilar. Stuðningur atvinnulífsins gerir okkur kleift að halda hátíðina með þeim metnaði og krafti sem við viljum og er um leið skýr staðfesting á þeirri samstöðu sem einkennir samfélagið okkar,“ sagði Vilhjálmur.

Saman með ljós í hjarta

Ljósanótt er menningar- og fjölskylduhátíð þar sem íbúar, félög, listafólk og fyrirtæki taka virkan þátt í að skapa fjölbreytta dagskrá. Þessi samstaða endurspeglast í einkunnarorðum hátíðarinnar, „Saman með ljós í hjarta“ .

Dagskrá Ljósanætur 2026 er aðgengileg á ljosanott.is , þar sem einnig má finna upplýsingar um styrktaraðila og samstarfsaðila hátíðarinnar.

Lokanir gatna á Ljósanótt 2026

Tue, 18 Aug 2026 16:58:28 GMT

Takmarkanir á umferð

Takmarkanir verða á umferð gatna við hátíðarsvæði Ljósanætur frá föstudegi til sunnudags. Hátíðarsvæðið er sýnt á meðfylgjandi mynd.

Þungar lokanir á og umhverfis Hafnargötu taka gildi föstudaginn 4. september kl. 09:00 og þeim verður aflétt sunnudaginn 6. september kl. 13:00 ef frá er talin lokun við Ægisgötu sem verður aflétt kl. 19:00.

Dagskrá föstudagssviðsins og kjötsúpunnar frá Skólamat fer fram við Ráðhús Reykjanesbæjar að Tjarnargötu 12. Sömuleiðis verður boðið upp á ókeypis barnadagskrá í skrúðgarðinum í Keflavík alla helgina. Af þessum sökum verður Tjarnargötu lokað á milli Kirkjuvegs og Vallargötu frá kl. 09:00-23:00 á föstudegi. Bílastæðin við skrúðgarðinn verða lokuð frá föstudagsmorgni til kl. 12:00 á sunnudag.

Hátíðarkort Ljósanætur má finna hér.
Allar hagnýtar upplýsingar má finna hér

Hagnýtar upplýsingar 2026

Tue, 18 Aug 2026 13:40:03 GMT

Strætó, rafhlaupahjól, stæði fyrir húsbíla og ferðavagna, hátíðarkort o.fl.

Allar helstu upplýsingar tengdar hátíðinni má finna hér. Má þar nefna upplýsingar um bílastæði, salerni, lokanir gatna, samgöngur og margt fleira.

Alla dagskráliði Ljósanætur má finna hér

Hátíðarkort

Hægt er að hlaða niður hátíðarkorti Ljósanætur hér en þar koma fram allar helstu upplýsingar

Stæði fyrir húsbíla og ferðavagna

Hægt verður að leggja ferðavögnum og húsbílum við Smábátahöfnina í Gróf. Þar verður boðið upp á rafmagn og salerni. Einnig er hægt að leggja á Fokkunni við hús Sýslumannsins á Suðurnesjum og á grasbletti við Hringbraut/Vesturbraut. Þar er þó engin þjónusta, hvorki rafmagn né salerni. Upplýsingar um verð má finna hér.

Ljósanæturstrætó - ókeypis

Allar upplýsingar um innanbæjarstrætó má finna hér.

Athugið að landsbyggðarstrætó gengur samkvæmt hefðbundinni áætlun þar sem söfnunarstaður er við Miðstöð. Upplýsingar má finna á streato.is

Handverksmarkaður á Hafnargötu 22

Hið margrómaða handverkstjald flyst nú á Hafnargötu 22. Þar lofum við frábærri markaðsstemningu þar sem fjölmargir söluaðilar selja spennandi handverk og annan varning.

Rafhlaupahjól - Hopp

Hraði verður takmarkaður á hátíðarsvæðinu ásamt því að sérstök afsláttarsvæði verða við Ránargötu, Greniteig 53 og Slippfélagið. Nánar um það hér.

Gleðilega Ljósanótt - saman með ljós í hjarta!

Ljósanæturstrætó 2026

Tue, 18 Aug 2026 13:03:23 GMT

Við hvetjum alla til þess að skilja bílinn eftir heima á Ljósanótt og nýta sér ókeypis Ljósanæturstrætó.

Á Ljósanótt verður boðið upp á sérstakan Ljósanæturstrætó innanbæjar á hluta föstudags, á laugardag og sunnudag.

Ókeypis aðgangur verður í Ljósanæturstrætó.

Þegar Ljósanæturstrætó tekur við af hefðbundum strætó verða eknar þrjár leiðir R1 Keflavík, R2 Njarðvík, R3 Ásbrú og svo pöntunarþjónusta fyrir R4 Hafnir. Vagnarnir munu fara 50 mínútur yfir heila tímann á söfnunarstað við Myllubakkaskóla áður en þeir halda í miðstöð í Krossmóa til að hefja leið sína.

Föstudagur:

Ljósanæturstrætó tekur við af innanbæjarstrætó kl. 16:00-01:00 og ekur á klukkustunda fresti. Fyrsta ferð kl. 16:00 og lokaferð kl. 23:50 frá Myllubakkaskóla.

Laugardagur

Akstur á klukkustunda fresti samkvæmt áætlun frá kl. 10:00-01:00. Fyrsta ferð kl. 10:00 og lokaferð kl. 23:50 frá Myllubakkaskóla.

Sunnudagur:

Akstur á klukkustunda fresti samkvæmt áætlun frá kl. 10:00-17:00. Fyrsta ferð kl. 10:00 og lokaferð kl. 15:50 frá Myllubakkaskóla.

Upplagt fyrir fjölskyldur og hópa að halda gleðinni gangandi með strætóferð auk þess sem yngsta kynslóðin kann vel að meta það.

Athugið: Landsbyggðarstrætó gengur samkvæmt hefðbundinni áætlun og verður söfnunarstaður við Miðstöð. Hægt er að sjá áætlun á straeto.is

Verður þú með viðburð á Ljósanótt?

Wed, 15 Jul 2026 10:26:39 GMT

Verður þú með viðburð á Ljósanótt?

Nú fer dagskrá Ljósanætur 2026 óðum að taka á sig mynd. Öll dagskrá birtist hér á vefnum í ágúst.

Allir þeir sem standa fyrir viðburðum á Ljósanótt eru beðnir um að skrá þá sjálfir í viðburðadagskrána og þannig verða þeir sjálfkrafa hluti af heildardagskrá Ljósanætur. Það er einfalt að skrá viðburð.

Hér efst í hægra horni síðunnar er flipinn "Skrá viðburð." Smellt er á hann og allar upplýsingar um viðburðinn skráðar inn. Hægt er að setja inn upplýsingar á ensku einnig og eru allir hvattir til að gera það en það er þó ekki skilyrði. Merkja þarf við um hvers kyns viðburð er að ræða og einnig hvenær hann fer fram. Mikilvægt er að senda inn mynd með öllum viðburðum. Þegar viðburðurinn er klár til að senda inn er smellt í reitinn "Skrá viðburð."

Ef allt hefur gengið upp birtast skilaboðin "Takk fyrir að senda inn viðburð". Þá fer viðburðurinn til yfirlestrar og í framhaldi er hann birtur á vefsíðunni. Þetta getur tekið allt upp í sólarhring svo engin ástæða er til að örvænta þótt viðburður birtist ekki um leið og hann hefur verið innsendur.

Hér má finna reglur um notkun merkis og nafns Ljósanætur

Viltu selja eitthvað á Ljósanótt?

Wed, 15 Jul 2026 10:15:42 GMT

Viltu selja eitthvað á Ljósanótt?

Þeir einstaklingar, félagasamtök og fyrirtæki sem hyggjast vera með sölu af einhverju tagi á Ljósanótt 2026 eru vinsamlegast beðnir að hafa samband við umsjónarmann söluplássa á netfangið sala@ljosanott.is og tilkynna um þátttöku.

Leyfilegt er að vera með torgsölu frá fimmtudeginum 3. september til sunnudagsins 6. september.

Takk fyrir frábæra Ljósanótt!

Mon, 08 Sep 2025 14:24:04 GMT

Að halda utan um fjölskyldu- og menningarhátíð eins og Ljósanótt fyrir rúmlega 20 þúsund manna bæjarfélag og þúsundir gesta til viðbótar er ekki lítið verkefni. Fjöldi fólks leggur sitt af mörkum svo allt gangi sem best og því hefst undirbúningur mörgum mánuðum fyrir hátíðina.

Í ár léku veðurguðirnir svo sannarlega við okkur, þótt nokkrar rigningardembur og sunnudagurinn minntu á að haustið væri á næsta leiti. Það breytti þó engu um þá frábæru stemningu sem ríkti í bænum, enda er það ekki veðrið sem ræður ferðinni heldur gleðin, samstaðan og viljinn til að skapa eftirminnilega upplifun fyrir alla, saman með ljós í hjarta.

Það var ánægjulegt að sjá hversu margir nutu þess að taka þátt í fjölbreyttri dagskrá sem sameinar bæjarbúa og gesti í gleði og samstöðu ár hvert og þessi 24. hátíð var engin undantekning. Sérstaklega er ástæða til að fagna því að hátíðin gekk vel fyrir sig án alvarlegra atvika. Þar skipti undirbúningurinn miklu máli, ekki síst sú áhersla sem lögð var á forvarnir og uppbyggileg samskipti í aðdraganda hátíðarinnar. Slíkt starf er ómetanlegt og á sinn þátt í að skapa örugga og ánægjulega hátíð fyrir alla.

Fyrir hönd Reykjanesbæjar vil ég færa öllum þeim sem komu að undirbúningi og framkvæmd hátíðarinnar hjartans þakkir, starfsfólki bæjarins, viðbragðsaðilum, listafólki, félagasamtökum, fyrirtækjum og styrktaraðilum. Síðast en ekki síst þakka ég ykkur, íbúum og gestum, sem fjölmenntuð á viðburði helgarinnar með bros á vör og gerðu hátíðina lifandi. Án ykkar væri engin Ljósanótt.

Kjartan Már Kjartansson, bæjarstjóri

Ljósberar ganga til liðs við Ljósanótt

Thu, 28 Aug 2025 21:11:57 GMT

Styrktarsamningar við aðalstyrktaraðila Ljósanætur 2025, svokallaða Ljósbera voru undirritaðir í vikunni. Hátíðin verður haldin í 24. sinn dagana 4.–7. september og undirbúningur er í fullum gangi.

Í ár taka á sjötta tug fyrirtækja þátt í að styðja hátíðina með fjárhagslegu framlagi eða þjónustu – og enn bætist í hópinn. Ljóst er að án öflugs stuðnings atvinnulífsins væri ekki hægt að halda Ljósanótt með jafn kröftugum hætti og raun ber vitni.

„Það er ómetanlegt þegar fyrirtæki á svæðinu láta sig samfélagið varða,“ sagði Halldóra Fríða Þorvaldsdóttir, starfandi bæjarstjóri, við undirritunina. „Fjöldi íbúa starfar hjá þessum fyrirtækjum og sýnilegur stuðningur þeirra styrkir bæði traust og stolt starfsfólks. Það er alltaf ánægjulegt þegar allir leggja sitt af mörkum svo vel megi takast til.“

Ljósberar Ljósanætur 2025

Aðalstyrktaraðilar Ljósanætur – Ljósberarnir – eru í ár:
Landsbankinn, KEF Keflavíkurflugvöllur, Skólamatur, BUS4U,
Blue Car Rental, Nettó og GTS.

Með stuðningi sínum taka Ljósberarnir virkan þátt í að auðga bæjarlífið og styrkja um leið þá þætti sem eru órjúfanlegur hluti þess að skapa starfsmönnum og viðskiptavinum eftirsóknarvert umhverfi til að lifa og starfa í.

Hátíð með rætur og hefðir
Ljósanótt er menningar- og fjölskylduhátíð sem dregur nafn sitt af lýsingu á sjávarhömrunum „Berginu“ sem blasir við frá hátíðarsvæðinu. Lýsingin var afhjúpuð á fyrstu Ljósanóttinni árið 2000 og hefur allar götur síðan verið táknrænn hápunktur hátíðarinnar, ásamt stórtónleikum og flugeldasýningu á laugardagskvöldinu.

Á Ljósanótt er lögð áhersla á fjölbreyttar uppákomur frá fimmtudegi til sunnudags. Menning hefur verið rauður þráður hátíðarinnar frá upphafi – með tónlist og myndlist í fararbroddi – enda Reykjanesbær annálaður tónlistarbær.