Hagnýtar upplýsingar

Framkvæmd Ljósanætur

Reykjanesbær hefur umsjón með hátíðinni en framkvæmdastjóri Ljósanætur er Valgerður Guðmundsdóttir, menningarfulltrúi, netfang valgerdur.gudmundsdottir@reykjanesbaer.is.

Allar upplýsingar um Ljósanótt eru veittar í gegnum netfangið ljosanott@ljosanott.is, í Ráðhúsi Reykjanesbæjar í síma 421 6700 og í upplýsingasíma Ljósanætur 891 9101 sem starfræktur verður Ljósanæturhelgina.

Upplýsingasími á hátíðarhelgi

Upplýsingasími Ljósanætur sem starfræktur er á hátíðarhelginni er 891-9101. Gott ráð er að skrifa gsm númer á handabak ungra barna ef þau skyldu verða viðskila.

Dagskrárviðburðir á Ljósanótt

Dagskrá er birt á vefnum ljosanott.is jafnóðum og hún tekur á sig mynd og þurfa allir þátttakendur að skrá sína viðburði beint inn á vefinn. Undir flipann "Skrá viðburð" eru settar inn viðeigandi upplýsingar og mynd. Viðburðurinn bíður þar samþykktar og er birtur að yfirferð lokinni. Öll dagskrá er birt með fyrirvara um breytingar.

Stæði fyrir húsbíla og tjaldvagna

Verða á tveimur stöðum, annars vegar við Myllubakkaskóla og hins vegar verður hægt að koma sér fyrir á grasflöt norðan við hátíðarsvæðið í nágrenni við smábátahöfnina í Gróf en þar er ekki boðið upp á aðra þjónustu en salerni (ekkert rafmagn). Stæðin við Myllubakkaskóla eru opin frá kl.16.00 á fimmtudegi. Þar er boðið upp á rafmagn og kalt rennandi vatn. Gjaldtaka fyrir húsbíla/ferðavagna er við Myllubakkaskóla. Losun ferðasalerna er í Skólpdælustöðinni við Fitjabraut 1a.

Minnt er á leiðbeiningar Mannvirkjastofnunar um brunavarnir á tjaldsvæðum sem sjá má hér.

Ljósanæturstrætó  

Notum strætó á Ljósanótt!
Frítt er í Strætó frá miðvikudeginum 04.09. 2019 og út laugardaginn 07.09.2019.

Föstudagur

Reykjanesbær minnir á að strætó heldur ferðaáætlun á föstudag. 
AUKAFERРverður farin á föstudagskvöldið sem hér segir:
Frá Miðstöð
R1 -  kl.21.00
R2 - kl.21.30 
R3 - kl.21:30
R4 (Hafnir) - kl. 21:30

Laugardagur

Á laugardeginum er keyrt sem hér segir:
Frá Krossmóa á klukkutíma fresti frá kl. 11:00 - 24:00.
ATH! ferð kl. 19:00 fellur niður.

Strætó ekur leiðina:
Mínútur yfir heila tímann:

Frá Krossmóa (00) - Grænásbraut 1220 (07) - Engjadalur (15) - Akurskóli - (17) - Krossmói (30) - Holtaskóli - Vatnsholt (36) - Heiðarsel (41) - Norðurtún (45) - Krossmói (50).
Stoppað á öllum stoppistöðvum á leiðinni. 

Leigubílar

Söfnunarstaður leigubifreiða á laugardag og aðfararnótt sunnudags er við Tjarnargötutorg (Tjarnargötu 12).

Bílastæði

Bent er á bílastæði neðan Hafnargötu við Ægisgötu og við Tjarnargötu 12 en þar eru sérmerkt bílastæði fyrir fatlaða.

Lokanir gatna

Takmarkanir verða á umferð gatna við hátíðarsvæði á föstudagskvöldi og laugardegi. Lokað verður neðan Kirkjuvegar og Sólvallagötu frá Gróf og að Aðalgötu á laugardeginum. Íbúar eru hvattir til þess að skilja bílana eftir heima og ganga að hátíðarsvæði. Íbúar í lokuðum hverfum geta ekið inn og út um Norðfjörðsgötu. Einnig er hægt að aka upp Suðurgötu og út að Skólavegi.

Salerni  

Salerni verða staðsett við Öryggismiðstöð á Norðfjörðsgötu og á Ægisgötu við smábátahöfn. Einnig eru salerni á tjaldsvæðum við Myllubakkaskóla.

Geymum hundinn heima

Hundar eru bannaðir á hátíðarsvæði á laugardegi Ljósanætur. Gerum ráðstafanir til verndar  dýrum á meðan flugeldasýningunni stendur.

Drónaflug

Lög­reglu­stjór­inn á Suður­nesj­um hef­ur gefið út til­mæli um að flug hvers kyns ómannaðra loft­fara eða flygilda, svo­nefndra dróna, verði ekki yfir byggð eða þar sem mann­fjöldi er sam­an­kom­inn á Ljósanætur­hátíð í Reykja­nes­bæ.

Bent er á að ákveðnar regl­ur gildi um loft­för hér á landi. Þó ekki sé sér­stak­lega fjallað um dróna í lög­um nr. 60/​1998 um loft­ferðir sé þar engu að síður að finna ákvæði sem heim­ili ráðherra að tak­marka eða banna loft­ferðir al­mennt eða að hluta á ís­lensku yf­ir­ráðasvæði eða yfir því vegna al­manna­ör­ygg­is eða alls­herj­ar­reglu.

Einnig er vísað í lög­reglu­lög nr. 90/​1996 um hlut­verk lög­reglu við að tryggja ör­yggi borg­ar­anna og að koma í veg fyr­ir að því sé raskað. 

Göngum vel um bæinn

Ruslafötur eru staðsettar víða á hátíðarsvæði - göngum vel um bæinn okkar á Ljósanótt. Í ár verða tvenns konar ruslafötur sýnilegar á hátíðarsvæði sem gefur gestum kost á að flokka rusl. Einnig verða sérstök flösku- og dósasöfnunarílát á hátíðarsvæði. 

Ljósanæturfánar

Hægt er að fá fyrirtækjafána á ljósastaura hjá Logoflex s. 577 7701. Merkiprent gerir annað markaðsefni og aðra fána sem og Plexigler.

Öryggi í fyrirrúmi á Ljósanótt

Til að tryggja öryggi og halda uppi gæslu á Ljósanótt hefur öryggisráð Ljósanætur útbúið nákvæma áætlun fyrir alla aðila er koma að öryggismálum á svæðinu. Öryggisráðið, sem samanstendur meðal annars af fulltrúum slökkviliðs og sjúkraflutninga, lögreglu og björgunarsveita, hefur yfirfarið öryggismál sem tengjast svæðinu og hátíðarhöldum á komandi Ljósanótt. Hugað hefur verið sérstaklega að skipulagi á svæðinu og hugsanlegum uppákomum, aðkomu lögreglu, slökkviliðs og sjúkrabíla og annarra viðbragðsaðila sem og verkþætti og viðbrögð þeirra. 

Öryggisráð Ljósanætur minnir á öryggismiðstöð/upplýsingaþjónustu, þar sem fulltrúar frá slökkviliði og sjúkrahúsi eru í beinum samskiptum við alla viðbragðsaðila og er öryggismiðstöðin beintengd Lögreglu, Slökkviliði og Neyðarlínu.

Slökkvilið Brunavarna Suðurnesja og Lögreglan verða með aukinn útkallsstyrk á tímabilinu 12 á hádegi og fram eftir nóttu.

Með notkun TETRA fjarskiptakerfisins verður beint samband við Neyðarlínu og samræmt fjarskiptasamband við viðbragðsaðila s.s. slökkvilið, lögreglu, Björgunarsveit Suðurnesja og sjúkrahús. Því verður hægt að virkja hópslysaáætlun með stuttum fyrirvara. Hlutverk viðbragðsaðila er víðtækt en skilgreint eins og kostur er. Þá er ákveðið að fulltrúar viðbragðsaðila mæti í Öryggismiðstöð á hádegi til að fínstilla verkþætti og yfirfara stöðu mála, prófa fjarskipti o.fl.

Björgunarsveitin Suðurnes verður með björgunarbátinn Njörð allan daginn, en báturinn verður mannaður köfurum í viðbragðsstöðu og er fulltrúi þeirra í beinu sambandi við Öryggismiðstöðina. Þá verður einnig gæsla á svæðinu og bílar á ferðinni.