Að halda utan um fjölskyldu- og menningarhátíð eins og Ljósanótt fyrir rúmlega 20 þúsund manna bæjarfélag og þúsundir gesta til viðbótar er ekki lítið verkefni. Fjöldi fólks leggur sitt af mörkum svo allt gangi sem best og því hefst undirbúningur mörgum mánuðum fyrir hátíðina. Í ár léku veðurguðirnir svo sannarlega við okkur, þótt nokkrar rigningardembur og sunnudagurinn minntu á að haustið væri á næsta leiti. Það breytti þó engu um þá frábæru stemningu sem ríkti í bænum, enda er það ekki veðrið sem ræður ferðinni heldur gleðin, samstaðan og viljinn til að skapa eftirminnilega upplifun fyrir alla, saman með ljós í hjarta. Það var ánægjulegt að sjá hversu margir nutu þess að taka þátt í fjölbreyttri dagskrá sem sameinar bæjarbúa og gesti í gleði og samstöðu ár hvert og þessi 24. hátíð var engin undantekning. Sérstaklega er ástæða til að fagna því að hátíðin gekk vel fyrir sig án alvarlegra atvika. Þar skipti undirbúningurinn miklu máli, ekki síst sú áhersla sem lögð var á forvarnir og uppbyggileg samskipti í aðdraganda hátíðarinnar. Slíkt starf er ómetanlegt og á sinn þátt í að skapa örugga og ánægjulega hátíð fyrir alla. Fyrir hönd Reykjanesbæjar vil ég færa öllum þeim sem komu að undirbúningi og framkvæmd hátíðarinnar hjartans þakkir, starfsfólki bæjarins, viðbragðsaðilum, listafólki, félagasamtökum, fyrirtækjum og styrktaraðilum. Síðast en ekki síst þakka ég ykkur, íbúum og gestum, sem fjölmenntuð á viðburði helgarinnar með bros á vör og gerðu hátíðina lifandi. Án ykkar væri engin Ljósanótt. Kjartan Már Kjartansson, bæjarstjóri

Strætó, rafhlaupahjól, stæði fyrir húsbíla og ferðavagna, hátíðarkort o.fl.

Við hvetjum alla til þess að skilja bílinn eftir heima á Ljósanótt og nýta sér ókeypis Ljósanæturstrætó. Á Ljósanótt verður boðið upp á sérstakan Ljósanæturstrætó innanbæjar á hluta föstudags, á laugardag og sunnudag. Ókeypis aðgangur verður í Ljósanæturstrætó. Þegar Ljósanæturstrætó tekur við af hefðbundum strætó verða eknar þrjár leiðir R1 Keflavík, R2 Njarðvík, R3 Ásbrú og svo pöntunarþjónusta fyrir R4 Hafnir. Vagnarnir munu fara 50 mínútur yfir heila tímann á söfnunarstað við Myllubakkaskóla áður en þeir halda í miðstöð í Krossmóa til að hefja leið sína. Föstudagur: Ljósanæturstrætó tekur við af innanbæjarstrætó kl. 16:00-00:00 og ekur á klukkustunda fresti. Fyrsta ferð kl. 16:00 og lokaferð kl. 22:50 frá Myllubakkaskóla. Laugardagur Akstur á klukkustunda fresti samkvæmt áætlun frá kl. 10:00-01:00. Fyrsta ferð kl. 10:00 og lokaferð kl. 23:50 frá Myllubakkaskóla. Sunnudagur: Akstur á klukkustunda fresti samkvæmt áætlun frá kl. 10:00-17:00. Fyrsta ferð kl. 10:00 og lokaferð kl. 15:50 frá Myllubakkaskóla. Upplagt fyrir fjölskyldur og hópa að halda gleðinni gangandi með strætóferð auk þess sem yngsta kynslóðin kann vel að meta það.  Athugið: Landsbyggðarstrætó gengur samkvæmt hefðbundinni áætlun og verður söfnunarstaður við Miðstöð. Hægt er að sjá áætlun á straeto.is

Styrktarsamningar við aðalstyrktaraðila Ljósanætur 2025, svokallaða Ljósbera voru undirritaðir í vikunni. Hátíðin verður haldin í 24. sinn dagana 4.–7. september og undirbúningur er í fullum gangi. Í ár taka á sjötta tug fyrirtækja þátt í að styðja hátíðina með fjárhagslegu framlagi eða þjónustu – og enn bætist í hópinn. Ljóst er að án öflugs stuðnings atvinnulífsins væri ekki hægt að halda Ljósanótt með jafn kröftugum hætti og raun ber vitni. „Það er ómetanlegt þegar fyrirtæki á svæðinu láta sig samfélagið varða,“ sagði Halldóra Fríða Þorvaldsdóttir, starfandi bæjarstjóri, við undirritunina. „Fjöldi íbúa starfar hjá þessum fyrirtækjum og sýnilegur stuðningur þeirra styrkir bæði traust og stolt starfsfólks. Það er alltaf ánægjulegt þegar allir leggja sitt af mörkum svo vel megi takast til.“ Ljósberar Ljósanætur 2025 Aðalstyrktaraðilar Ljósanætur – Ljósberarnir – eru í ár: Landsbankinn, KEF Keflavíkurflugvöllur, Skólamatur, BUS4U, Blue Car Rental, Nettó og GTS. Með stuðningi sínum taka Ljósberarnir virkan þátt í að auðga bæjarlífið og styrkja um leið þá þætti sem eru órjúfanlegur hluti þess að skapa starfsmönnum og viðskiptavinum eftirsóknarvert umhverfi til að lifa og starfa í. Hátíð með rætur og hefðir Ljósanótt er menningar- og fjölskylduhátíð sem dregur nafn sitt af lýsingu á sjávarhömrunum „Berginu“ sem blasir við frá hátíðarsvæðinu. Lýsingin var afhjúpuð á fyrstu Ljósanóttinni árið 2000 og hefur allar götur síðan verið táknrænn hápunktur hátíðarinnar, ásamt stórtónleikum og flugeldasýningu á laugardagskvöldinu.  Á Ljósanótt er lögð áhersla á fjölbreyttar uppákomur frá fimmtudegi til sunnudags. Menning hefur verið rauður þráður hátíðarinnar frá upphafi – með tónlist og myndlist í fararbroddi – enda Reykjanesbær annálaður tónlistarbær.

Á Ljósanótt 2025 verða þrjú fyrirtæki með tívolítæki! SPRELL – verður með tæki á túninu við aðalsviðið frá fimmtudegi til sunnudags. TAYOLRS TIVOLI – verður með tæki við hlið gamla SBK hússins í Grófinni frá fimmtudegi til sunnudags. KASTALAR – verða með tæki frá fimmtudegi til sunnudags á túninu við Duustorg við enda Vesturgötu og Vesturbrautar. Kaupa þarf miða hjá hverju fyrirtæki fyrir sig og því gilda EKKI sömu miðar hjá öllum aðilum. Athygli er vakin á því að frítt verður í hoppukastalaland fyrir yngstu börnin í Skrúðgarðinum í Keflavík á laugardegi og sunnudegi! Íbúum Reykjanesbæjar býðst að kaupa miða í tívolítæki hjá fyrirtækjunum á tilboðsverði 3. og 4. september! Sunnudaginn 8. september verða miðar einnig seldir með 25% afslætti hjá Taylors. !SPRELL! 3. september miðvikudagur frá kl. 17-20. 4. september fimmtudagur frá kl. 17-20 Stakur miði verður á 50% afslætti (250kr) þessa tvo daga en eftir það fara þeir í almenna sölu og eru verðin þá eftirfarandi: Einn miði 500kr 10 miðar 4000kr 20 miðar 7000kr 30 miðar 9000kr 3-4 miðar í hvert tæki og endurgreiðsla ómöguleg. !TAYLORS TIVOLI! 3. september miðvikudagur frá kl. 17-20. 4. september fimmtudagur frá kl. 14-21. 25% afsláttur af Candyfloss og poppi Allt innifalið tilboð: 18 spilapeningar, 1 miði í verðlaunaleiki, 1 candyfloss eða poppkorn 10.000kr 20 spilapeningar 8.000kr Þrír heppnir viðskiptavinir vinna fimm spilapeninga í tækin hjá Taylors. Einn spilapeningur kostar 500kr utan tilboðsdaga og kostar að lágmarki tvo spilapeninga í hvert tæki. !KASTALAR! 3. september miðvikudagur frá kl. 15-19 4. september fimmtudagur frá kl. 15-19 Stakur miði verður á 50% afslætti (250kr) þessa tvo daga en eftir það fara þeir í almenna sölu og eru verðin þá eftirfarandi: Einn miði 500kr 6 miðar 2500kr 10 miðar 4000kr 20 miðar 7000kr 30 miðar + tveir skammtar af popp eða candyfloss = 10.000kr 2-4 miðar í hvert tæki.

Takmarkanir á umferð

Viltu selja eitthvað á Ljósanótt?

„Sólin gerir auðvitað gott betra“ sagði Guðlaug María Lewis, verkefnastjóri Ljósanætur í skýjunum eftir vel heppnaðan og sólríkan laugardag á Ljósanótt. „Við fögnuðum sérstaklega 30 ára afmæli Reykjanesbæjar með hreint út sagt frábærri tónlistarveislu og flugeldasýningu sem landsmenn fengu að njóta með okkur í beinni útsendingu.“ Skipuleggjendur hátíðarinnar telja að hún hafi verið með þeim fjölmennari og að tugþúsundir gesta hafi tekið þátt í dagskrá laugardagsins enda margt til skemmtunar. Að sögn Guðlaugar var virkilega góð og jákvæð stemning á svæðinu og langsamlega flestir staðráðnir í að vera með ljós í hjarta á Ljósanótt eins og lagt var upp með. „Við höfum auðvitað áhyggjur eins og aðrir af hópamyndun og ölvun unglinga sem virðist orðið samfélagslegt vandamál sem þjóðin þarf að taka höndum saman um að stemma stigu við. Eftir því sem við best vitum á þessari stundu gekk þetta stórslysalaust hjá okkur og fyrir það erum við þakklát.“ Síðasti dagur Ljósanætur er í dag og enn geta gestir sótt sýningar, tónleika og tívolí og þannig klárað það sem þeir hafa ekki komist yfir. Hátíðinni lýkur í kvöld með tónleikum Herberts Guðmundssonar og kórs Keflavíkurkirkju í Keflavíkurkirkju.

Hátíðarhöld á vegum Ljósanætur fóru vel fram í gær. Það voru 6000 lítrar af kraftmikilli kjötsúpu Skólamatar sem yljaði gestum í gærkvöldi í notalegri stemningu á meðan þeir hlýddu á tónleikadagskrá þar sem menningarverðlaunahafi Reykjanesbæjar, Magnús Kjartansson ásamt hljómsveitinni Vintage Caravan steig m.a. á stokk. Reykjanesbær fagnar í ár 30 ára afmæli sínu og leggur því sérstaka áherslu á tónlistararf sinn á Ljósanótt. Bjartur dagur framundan Í dag heiðrar sólin okkur með nærveru sinni og hefst dagskrá hefst með árgangagöngu upp úr hádegi. Við taka fjölbreyttir viðburðir og í kvöld verður boðið upp á sannkallað stórtónleika á aðalsviði þar sem tónleikadagskrá hefur verið sett saman sem snertir á ríkum tónlistararfi svæðisins. Það eru meðlimir Hjálma og Baggalúts sem fá með sér góða gesti til að gera þessu skil, auk annarra tónlistaratriða og verða tónleikarnir sýndir í beinni útsendingu á RUV. Margt fleira prýðir dagskrána í dag svo sem fjölbreyttir listviðburðir, ókeypis barnadagskrá, akstur glæsikerra og bifhjóla, leiktæki og matarvagnar og dagskrá kvöldsins lýkur með glæsilegri flugeldasýningu og tendrun ljósanna á berginu svokallaða, sem Ljósanótt dregur nafn sitt af.