Endurlit/Hindsight opnar fimmtudaginn 31. ágúst kl. 18:00 - 20:00 og mun sýningin standa yfir til 30. nóvember 2023.

Listamaðurinn Linda Steinþórsdóttir sækir innblástur til naumhyggju annars vegar og til expressjónisma hins vegar, þar finnur hún rými til að spegla eigin persónu og reynslu í gegnum afar persónulega náttúruskoðun, sem miðlað er áfram til áhorfandans. Formin í verkum Lindu leitast við að miðla flóknu samspili manns og náttúru sem á sama tíma er sjálfstæð upplifun í gegnum myndverk listamannsins.
Verkin eru oft áferðamikil, þar sem endurvarp myndanna minna á Ísland, hörð og ber náttúra er tjáð á striga í gegnum endurlit og íhugun listamannsins þar sem uppeldislandsins er minnst með formum og áferðum sem koma upp í minningalandi Lindu.
Linda reynir að feta mjóan stíg þar sem áhorfandinn skynjar spennu milli hins óvænta, hins nýja, hins flæðandi og hins kunnuglega. Einfaldleiki litrófs listamannsins má mögulega rekja til naumhyggju en áferðir myndverkanna eru þó mun tjáningaríkari, þannig kallast tvær ólíkar stefnur á innan sama striga í verkum listamannsins.
Það er mikill fengur í að fá Lindu Steinþórsdóttur til að opna í Bíósal Duus menningarhúsa í tilefni að Ljósanótt 2023. Listamaðurinn hefur alið flest sín fullorðins ár í Austurríki, því gefst íbúum Reykjanesbæjar ekki oft færi á að njóta myndverka listamannsins í uppeldisbæ hennar.

Linda Steinþórsdóttir fæddist í Keflavík árið 1968. Hún lærði fjölmiðlafræði og listasögu við háskólann í Salzburg einnig hefur hún stundað nám við International Summer Academy for Fine Arts í Salzburg hjá Varda Caivano.
Linda er meðlimur SÍM hún er ein af skipuleggjendum alþjóðlega málþingsins Art DIAGONALE Traunkunst 2016/ í samstarf við Museum Angerlehner / ART DIAGONALE II á Korpúlfsstöðum Reykjavík 2017, í samstarfi við Samband Íslenskra Myndlistamanna.